＊逃避＊

思念都成習慣，只係自己都好奇怪，日掛夜掛，
點會連個樣都唸唔返．

可能潛意識下想逃避掛，佢哋老咗個樣，醜既樣，
走嗰陣個樣，通通唔記得．
家陣唸得返既樣，都可能係因為對住佢哋啲相多，先會記到．

真係好怕唸返胖仔走嗰陣既情竟，佢既叫聲，佢既樣子，
唔會唔記得，只係唔想唸．
嗰陣係佢呢世仔最醜最醜既一刻，冇咗一隻眼仔，半邊面仔冇咗毛毛，
鼻上仲黐住兩條未拆既膠喉，條膠喉係要黎駁氧氣，
怕佢隨時缺氧要抱返去．

但我冇，唔想佢要吸氧續命，
唔想佢死喺嗰到而我地唔喺身邊，結果走咗，可能我錯咗．
但我講過，我點都唔會後悔．

一直放唔底，咁唔甘心，係佢走得咁辛苦，
冇咗隻眼都保唔到條狗命，好痛．
痛既係佢死唔放棄，兩日內，四個醫生分別同我講佢唔得，
叫我比佢走．
甚至乎免費打針，聽過未呀？免費呀！

到第五個醫生，佢話狗仔係死撐，
我知呀，佢隻眼，得一隻眼，但越撐越大，撐到可以搖尾尾．

支針點都打唔落，佢咁堅強，我點都唔忍心打嗰支針．
喺嗰到五日，要保命，續命，費用好多，獸醫叫我唸清楚，
值唔值得為一隻咁老既狗用咁多錢，
佢成百歲哪．．．

佢冇同我講明，但姑娘每日都問我要錢，每日付清．
佢哋怕狗仔走咗我會唔比錢，佢哋知狗仔走只遲早既事．

有時會唸，妹豬可能都係想我哋好，自己靜雞雞跟住走．
唔使我再一次面對上面既嘢，可以一次過喊晒去，
唔洗分兩次，唔洗再走呢條路，

多謝妹豬，我既寶貝！