＊我的妹豬＊

我同阿妹o既感情好平淡， 講唔上鍚唔鍚，佢跟本唔需要你鍚,
亦唔識得比人鍚，連抱抱都驚o既一隻傻狗．
最緊要係食，最開心係同胖仔喺公園仔玩，
成世狗傻頭傻腦，但亦都係佢o既福氣．

遇到阿妹係喺行人天橋上，落緊毛毛雨，旁邊有水水，有食物，就係冇屋企．
嗰陣佢得兩三歲，毛毛修剪得好靚，曾經嘗試同佢去搵舊主人，但失敗，
見過有人貼街招出五千蚊搵狗仔，但嗰隻唔係阿妹．
十年啦，花花o既愛心始終敵唔過流浪o既陰影，佢依然好保護自己．

阿妹除左條氣唔順，奶豬仲生左啲粒粒，鬼佬話佢皮膚比正常漙，難埋口，
叫我自己揀，我揀割，阿妹好叻女，四點做完手術，
七點已經坐左喺到等我抱佢返屋企，肚肚兩條長刀巴仲埋得好好添．
唔夠一年，奶豬生返，粒粒都生返，連屁股仔都有一個疱疱，唔割啦．

疱疱慢慢咁大，毛毛慢慢咁甩，醜怪o既係佢，無奈o既係我．
偶爾鼻鼻會出血，眼仔會發炎，會肚疴，
我怕同佢見鬼佬，怕聽嗰句，幫到佢o既就只有眼藥水同保濟丸，
三四年啦，佢依然食得，走得，瞓得，依然傻頭傻腦．

狗胖走左冇幾耐，阿妹身體啲問題開始一一浮出黎，
眼仔， 鼻鼻發炎，肚疴，突然連企o既能力都冇埋，
跟住就係唔飲唔食一晚，就．．．
只係相差十七日
阿妹一向好靜，就連要去搵狗胖都好靜，好叻女，好乖！