＊只想要一個家＊

一隻喺腦海中幾乎遺忘嘅狗仔，樣子懵懵，好可愛嘅鬆獅狗，
所以幫佢起咗個名--懵仔．

已經係十年有多，見到懵仔係喺城門隧道口嘅山坡旁，
腳仔受咗傷，三個人夾手夾腳推咗佢上車，黎到一間村屋到，
就咁，呢間村屋就成為懵仔嘅家，仲有兩個新朋友仔添．
到咗夜晚，放狗嘅時間到啦，門一開，兩隻唐狗仔已經雞咁腳走咗去，
懵仔？？ 死都唔肯行出門口一步，勉強拖行咗幾步，一放手就立即掉頭走返入屋．
一間只係住咗半日嘅屋，懵仔就認定呢到係佢新嘅家，
怕再一次失去屬於佢自己嘅家．　

呢間啱啱只係住咗半日嘅屋，石屋一間，門前石屎空地一塊，
用鐵絲網圍起，呢塊石屎地就係狗狗嘅家．
狗狗好簡單，要嘅只係一個家，一個瓦頂，一餐飽肚嘅飯，已經好滿足．

隨住石屋要遷折，又一次要幫懵仔搵新屋企，好好彩，
搵到新主人之外，仲有新朋友仔，都算係咁，亦因為咁再冇幾會見到佢啦．
突然間問咗自己一個問題，點解當初冇唸過收養佢？
呢個問題問遲咗好多年，相信懵仔已經走咗，走得比胖仔仲早．

只覺得同貓貓狗狗相處簡單得多，容易得多，真實得多．
只要比佢哋一個真心，佢哋亦都會回你一個真心，永遠嘅真心．
好似胖仔咁，到最後就算係幾咁辛苦，眼仔都越撐越大，
為嘅只係要返屋企，要你抱住佢，你就係佢嘅一切！